عجب ما دريت الوطن موش وطـنّا .. والملك حتى ملكنـا خاطيـنا
عجب مـا عرفت احوال مستقبلـنا ولا اقدرت نقرأ جزؤ من ما ضينا
عجب مـــــــــــــــــــــــــــــا دريت عـــــــــــــــــــــــــــــــــــــــــــــلاش ... ينزف ويبقى الجرح مـا يبـــراش
ولنّا زمن بالفرح ما احلمنــــــاش ... وفي اديارنـا غرّد البوم عليـــــنا
احذانا الغدير وبـايتين اعطـــــاش حتى بلل للـريق مــــــــــــا قدّينا
عجب يا رفيقي ما دريت علاش .. نامت ضمايرنا اومــــــا استاعينا
عجب يارفيقي ما دريت عـــلاش .. حي عودنا والسوس ينخر فينا
عجب والتعجّب لاش غير اهماش .. مادام قسموا الـــــرزق ملاّكينا
وما دمت متعــــــــوّد اتبات بلاش .. ياكل عوينك من خزن عوينـــه
وانبات نتناطح مثيل اكبـــــــــاش .. متقاسمين الليل في تركيـــنه
متناطحين الواش مـا افهمنــاش .. حال الزوايل شي ما يعنيـــــــنا
لاش نفهموا مادام ما وعينـــاش .. جزّارنا حاضــــــــــــر تربّص بينا
وحتى عددنا عارفه قــــــــــدّاش .. دارس نتايجنا اذا التمّيـــــــــــنا
ولوكان تبغي الحق ما ظلمناش .. احني من ظلمنا ارواحنا بيدينا
احني من وقفنا وين ما زدنــاش .. سناوات فوق الصفر ما اتعلّينا
احني من كلتنا النار ما فقنـاش .. احني من جرفنا السّيل ما حسّينا
احني من عشرنا مرض ما يبراش .. الذل والخيانه وتفرقة ذرّيــــــــــنا
احني من جعل منّا العدو افــراش .. معاه طايعين الامر وامتدّيــــــــــنا
احني من نكس راسه وما هزّاش .. وجي منحره امقادي شفر سكّينه
وجات نحرته في وين ما يبــــراش .. اضرب وين ما عادش ايصحّح عينه
رحل ما بكاته ذابلة لرمـــــــــــاش .. الي بايته فيـد العـــــــــــــدو رهينه
الي نوّحت بكري وما اسمعهاش .. بكت عل شرف عربي امسيّب دينه
بكت عل شرف قبضوه حقّه كاش .. هي ما درت بالسمسره مسكينـه
صبرت هنادي الصبر مالزّاهــــاش .. وباعت هنادي عمـــــرها واسنينه
ورحلت هنادي ورحّلت قــــــدّاش .. وغبنا نهار الفرح مالتمّيـــــــــــنا
وحقّك علينا مـا اتنادينــــــــــاش .. وحدك اتديري الفـــــــــرح واتخلينا
نهار زفّتك غبنا وما احضـــــرناش .. لامن استدعـانا ولا ستدعيــــــــنا
انت يا هنادي فيك ما نكرنــــاش .. حتى رحلتي الموت جاتك زينـــــه
وخايف علينا انموت ما نسـواش .. لانايحه لامن ايقيم دفيـــــــــــــنه
ومانا التدغنا قبل ما فقنـــــــاش .. في الجحر نفسه مادّين ايديــــــــنا
من الدرس لوّل ما استاعيناش .. عجب لااستوعبنا ولا دلّيــــــــــــــنا
ولاش العجب في عصر فيه اوباش .. والسوق والـدّلاّل في امباديــــــنا
باعوا شرو ماقال حــد عـــــــلاش .. زي مـا اصبحنا خاسرين مسينا
وننبش على الي فات بالمنقـاش .. ونبكي نهار وليل علي ماضينا
ونجع العرب ما زالشي يوحــــاش .. اللي مـا بقي في واقعـي يعنينا
الهذا السبب لليوم ما وصلنـــاش .. واتقـولّي لازم النصر ايجيـــــــنا؟؟
بلا فعل ريح النصر ما تلفـــــــــاش .. وتبقوا فناة العمر مشتاقينا
شي مـا قعد الا النديب بـــــــلاش .. هي نندبوا خلّي الخــدود عجينه
ونتلحّفوا بفليج عوض لقمـــــاش .. ونعطي خلاخــــــــل فاطمه المارينه
وشد الدّفي اسكر ومـا تسحاش .. في سكرته المخمـــور ينسى دينه
عجب يا عجب كانوا العرب كيفاش .. وكيفاش فتحوا اسوار كـــــل مدينه
وياريتها عاقر وما تضنـــــــــــــــــاش .. وماتت ومــــا جابت اوجـــوه غبينه
احني لاش احسن كان ما اخلقناش .. خير ما انتصروا وخير مــا ذلّينا
احني عندنا الطمّاع والمكـــــــــــراش .. هم عندهم حكمة اعقول رصينه
احني عندنا السمسار والغشّــــاش .. هـــــم يتقنوا ضربة اخوتنــا بينا
هم ينزلــوا في برّنـــــــــــــــا شوّاش .. احني نركعــوا خـــــدّام مايعنينا
هم لاانجرح واحد نهار اغبـــــــــــاش .. احني كل يوم انموت بالطّزّينه
احني دمّنا هيّن اومايســـــــــــواش .. وهم دمّهم غــــالي صعيب علينا
العربيّة
English
French
Spanish
Portuguese
Deutsch
Turkish
Dutch
Russian
Romaian
Portuguese (Brazil)
Greek